Goullo
Prizioù Frañs3 2014 e Pont-'n-Abad
Les Prizioù à Pont-l'Abbé
Priz al levr a faltazi 2014 zo aet gant Herve Gouedard evit e romant Paul Sérusier, ul livour e Breizh, embannet gant Al Liamm.
Le Prix du livre de Fiction 2014 a été gagné par Herve Gouedard pour son roman Paul Sérusier, ul livour e Breizh, édité par Al Liamm.
Emabnnet eo bet ar pennad-mañ en Al Lanv n°131 - C'hwevrer 2014. Koumanantit!
Ha gellout a ra emsav ar Bonedoù Ruz bezañ, ouzhpenn un nerzh enebiñ, un nerzh sevel ?
Evel m’o deus lavaret ha skrivet an arvesterien aketus abaoe an deroù ez eo bet an ekotaos ar goell en deus lakaet an toaz da c’hwezañ... Abaoe ar penn-kentañ, avat, edomp a-enep an taos direizh-se noazus ouzh armerzh Breizh. E miz C’hwevrer 1999 edon dija e manifestadeg ar Gravelle aozet gant oberourien armerzh Breizh evit sevel hor mouezhioù ouzh ar pezh a anved, da neuze, « taos Borloo ». N’edomp ket o vont da zegemer dindan an tu kleiz ar pezh a oa bet staliet gant an tu dehou ha nac’het ganeomp ! Ma’z eo direizh ul lezenn, pe da vihanañ, mar soñj deomp ez eo noazus ouzh Breizh, ne vern liv politikel ar gouarnamant. Mad Breizh a dremen da gentañ. Setu perak e oamp aet kengred diouzhtu gant FDSEA Penn-ar- Bed ha gant sindikadoù all pell-mat a-raok an darvoudoù grevus c’hoarvezet e Pont-ar-Veuzenn evit klask dispenn ar porched ekotaos etre Kemper ha Brest.
Kerkent ha ma oa bet distrujet porched Gwiklan en hañv tremenet hor boa embannet ez foran edomp a-du gant an oberourien armerzhel war an teuliad-se. War-un-dro ez eus bet dispaket steuñvoù sokial a bouez er c’heleier (Gad, Doux, Marine Harvest...). Amañ, er vro, e Karaez hon eus kroget e-barzh start hag e oa deuet 6OO a dud en emvod kentañ evit klask aozañ ar stourm a-enep. Buan hon eus santet e c’helled strollañ ar stourmoù hag an aozadurioù hag en doare-se eo bet ganet ar stroll « Bevañ, divizout ha labourat e Breizh », dezhañ da c’her-stur emsevel evit an implij, evit Breizh hag evit an hentoù digoust e Breizh. Kejañ ouzh Thierry Merret a zo bet a bouez bras, a-dra-sur, hogen bez’ e oa en-dro d’an daol blenierien micherourien evel Nadine Hourmant a embregerezh Doux, Olivier ar Braz a embregerezh Gad, ha dileuridi a embregerezh Marine Harvest, kenwerzhourien, treuzdougerien, moraerien... berr-ha-berr dileuridi a gevredigezh Breizh ral o c’havout en ur ser, hogen mennet.
N’eo ket neptu dibab ar gerioù, ennañ emañ ar respont d’ho koulenn. Diwar arc’hadurioù rummadoù tud eur deuet d’un arc’hadur politikeloc’h o kadarnaat e fell ivez d’ar stroll divizout er vro ha kaout ar binvioù ensavadurel ret evit klask reiñ lañs da armerzh Breizh. Setu perak ez eo ar ger-stur abaoe an deroù : implij, Breizh ha hentoù digoust. Evel-just eo deuet ar breudoù er c’helaouennoù war dachenn ar rannvroeladur, ar statud ispisial evit Breizh, ar gwir da vezañ disheñvel, adstaliañ an divizoù... o vezañ ma oa kement-se holl dija en hol luganioù hag hon titloù. Gant an Emglev evit Dazont Breizh kinniget gant Jean-Marc Ayrault ez eus bet dalc’het un tammig kont eus hor mennadoù, anat eo, pell emañ Yann diouzh e gazeg avat, ha ret e vo derc’hel da glezeiata er sizhunioù hag er mizioù da zont evit lakaat hor mennozhioù da drec’hiñ en Emglev-se hag, hep ket a var, en doare kentañ eus al lezenn war an digreizennañ. Goulennet ez eus bet ganeomp digant François Hollande dont da Vreizh da vreutaat ha da embann un adlañs nevez evit ar Rannvroeladur, ha bremañ eo bet embannet er gelaouenn Le Monde e c’hellfe dont da Vreizh hep dale. Ne vo ket evit tremen hebiou d’ar gaoz war an danvez ensavadurel re zister en Emglev evit Dazont Breizh, war ar galloudoù nevez goulennet gant Breizhiz, war an arc’hant... Er c’heñver-se e c’hellomp lavarout eta omp tremenet eus ul lankad enebiñ ha traken (ekotaos...) d’ul lankad nevez a sevel ur Vreizh kresket hegalloudoù. Koulskoude e chom kadarn ar c’hreñvlec’h jakobin ha pa emdrofe war an tu mat, ha buanoc’h eget ma kreder, ar speredoù er vro-mañ. Er stourm eo e teu emskiant d’an dud...
Penaos didoueziañ etre ar Bonedoù Ruz ofisiel hag ar re en em servij eus an anv war internet, da skouer ?
Diaes eo mirout ouzh an dud a ober ar pezh a garont war ar genrouedad ha setu perak ez eus bet staliet ganeomp ur skipailh e karg eus ar c’hehentiñ ofisiel war ar rouedadoù en anv ar stroll « Bevañ, divizout ha labourat e Breizh ». Skrivet ez eus bet ganeomp ivez ur garta a zisklêr « ez embannomp talvoudoù araokaat, kenskoazell, kenfiziañs ha denelouriezh. Emaomp a-enep d’ar gasoni ha da nac’hadur an nesañ ». E deroù an emsevel am eus embannet a vouezh uhel ha war ar groaz en holl vedia ar pezh a soñjan eus an FN : « ur poezon e vefe evit Breizh pa’z eo ar Bonedoù Ruz an enep-poezon ». Kloz e seblant bezañ ar gaoz-se. Bepred e vez klasket hor c’hlozañ en ur rummad pe hol louzañ, pa zirenkomp ar galloud staliet pe c’hoazh ar re ne soñjont ket ez eus reizh gant ar bobl ouzh en em aozañ. N’eo ket touellet Breizhiz na Breizhadezed, avat.
Petra ’zo war ar stern gant ar Bonedoù Ruz, bremañ ?
Sevel ar muiañ ar gwellañ a boellgorioù lec’hel dre Vreizh istorel a-bezh. Adkaserioù holldalvoudus e vint pa zeuio ar mare da gregiñ e-barzh. Ret eo en em astenn war Vreizh a-bezh hag evit kement-se ez eus ezhomm eus un tamm aozadur hag un tamm amzer. Emaomp o vont da zerc’hel d’en em gannañ evit al labour, evit Breizh hag evit an hentoù digoust e Breizh. Pedet on bet e Pariz e ministrerezh an difenn gant ar ministr, Jean-Yves le Drian, bet kadoriad kuzul-rannvro Breizh, evit kaozeal eus stad an traoù en hor bro hag eus ar gwellañ doare da zigabestrañ an energiezhioù evit adreiñ lañs da armerzh Breizh. Komzet hon eus kalz a rannvroeladur evel eus unan eus ar binvioù a c’hell adreiñ startijenn (sic) d’hor bro. Breutaet am eus evit ma vo skrivet ur bajennad nevez eus an digreizennadur a-stroll gant nerzhioù bev Breizh. N’eo ket tapet ar maout en a-raok ha ret eo d’an holl chom engouestlet er stourm...
© Al Lanv 2014
BISIGOÙ MAREÑV
Me zo bet o kantren 'hed ar girzhier,
Oa bisigoù ouzh ar bizhier
En istribilh strilh-distrilhet,
Oa bisigoù ouzh ar bodoù a-strolladoù...
-Kozh bravigoù, c'hoarielloù,
Bazoulennoù kleier aner melen tener.-
Ha 'm eus karget va godelloù
Mac'hom 'giz ur c'hrouadur!
Ur wech distro, skuizh o kantren,
N'em eus kavet nemet poultrenn
...Ludu louet va flijadur!
Reunan ar Mougn
Barzhaz, kant barzhoneg berr, 1350-1953, Al Liamm 1953
Levrioù elektronek / Livres électroniques / Ebooks
Tamm-ha-tamm e vo kavet levrioù elektronek e stumm epub war lec'hienn KaB, dreist-holl adembannadurioù levrioù kozh pe diviet en o stumm paper.
Nevez war katalog an Alarc'h: Amañ ha du-hont gant Per an Intañv. 3€ hepken!
Vous pourrez très bientôt accéder à des livres électroniques au format epub sur le site de KaB, principalement des rééditions de titres épuisés en version papier.
Nouveau chez an Alarc'h : Amañ ha du-hont de Pierre Lintanf. 3€ seulement !
Very soon you will find ebooks in epub format on KaB's website, mostly old or out of print books.
New on an Alarc'h's catalogue: Amañ ha du-hont by Pierre Lintanf. Only 3€!
Eskemm war ar yezh a-vremañ
Kinnig a reomp d'hol lennerien eskemmoù bet da heul goulennoù hag a denn d'ar vuhez a-vremañ. Digor e chom an eskemmoù-mañ, ha gant plijadur eo e resevimp evezhiadennoù, kinnigoù ha goulennoù all digant hol lennerien...
Hor Yezh
VAPOTER
B1. Gl. Vapoter
Ar verb vapoter a zo ur ger nevez-savet e galleg evit ober anv eus “butunat sigaretennoù elektronek”. Savet eo bet er bloaz 2008 war ur forom Internet da heul ur genstrivadeg roet lañs dezhañ gant daremprederien ar forom-se. Berzh en deus graet buan ar ger ha degemeret un tammig dre holl bremañ ha kavet en deus e lec'h er geriadurioù galleg. Implijerien ar sigaret elektronek a gav gwelloc'h ober gant ur ger evel-se eget gant “fumer”, evit diskouez mat ne “vutunont” ket, met e vez “enanalet” un “aezhenn’ (un aerosol e gwirionez) ha neket moged diwar deviñ un danvez.
MM: Gwelet em eus war load Ofis ar Brezhoneg unan bennak o kinnig butunaezhiñ.
RK: Soñjal a ran e butuneliñ peogwir ez eo ur sigaretenn elektronek.
DK: Dre m'eo ur sigaretenn elektronek: sigaretel? evel ma kaver dija postel (post elektronek), levrel... (levr elektronek)? Ijinañ diwar se: butuneliñ, butunelat, fumeliñ...? pe neuze, dre ma n'eo ket butun evit gwir, met "aezhenn": mogedeliñ, aezhenneliñ?... aezhaneliñ (meskaj aezhenn/analiñ/ hag "el" (elektronek)?
MM: N’ouzon ket gant piv e oa bet kinniget Br. butunaezhiñ en Ofis… Met gwell eo dilezel.
Ur splet bras zo gant kinnig Divi : butuneliñ. Reiñ a ra an tu d’ober gant butunel a-dal da Gl. cigarette électronique, e-cigarette. Arabat disoñjal eo gourel ar ger, evel postel… ur butunel eta ha butuneloù.
Butuneliñ a gavo e blas e-kichen Br. posteliñ am eus kinniget e DFBMM (cf. melladoù courrier, message). Krog eur d’ober e galleg gant courrieler diwar courriel.
DK: N'eo ket ken fall-se butunaezhiñ pa gaver e-barzh an elfenn "aezh(enn)" da lakaat e kemm gant Gl. vapoter hag ar Sz. to vape. Ur seurt aezhenn a vez enanalet. E gwirionez n'eus ket "butun" e-barzh.
Evit ar ger evit "cigarette électronique", "e-cigarette", pa weler ar gerioù a gaver er yezhoù all (lakaet e stumm un notenn:
Diwar Wikipedia, hag en ur zelc'her kont nemet eus ar yezhoù a ra gant al lizherenneg latin.
alamaneg: elektrische Zigarette; azerbaidjaneg: elektron siqaret; daneg: elektronisk cigaret; esperanteg: elektronika cigaredo; estonianeg: elektrooniline sigaret; finneg: Sähkötupakka; galleg: cigarette électronique; hungareg: elektronikus cigaretta; indonezeg: rokok elektronik; islandeg: rafretta; italianeg: sigaretta elettronica; katalaneg: cigarreta electrònica; kroateg: e-cigareta; lituanianeg: elektroninė cigaretė; nederlandeg: e-sigaret; norvejianeg (bokmål): elektronisk sigarett; poloneg: e-papieros; portugaleg: cigarro eletrônico; saozneg: electronic cigarette, e-cigarette; sloveneg: elektronická cigareta; spagnoleg: cigarrillo electrónico; svedeg: elektronisk cigarrett; tchekeg: elektronická cigareta; turkeg: elektronik sigara.) ne welan ket penaos e vo gallet distroadañ un dra diazezet war ar ger sigaret(enn).
MM: Me zo mat din butunaezhiñ pe butunat ur sigaretenn elektronek.
Butunat ur butunel zo ponner un tamm.
Tennet eo ar pennad-mañ eus ar gelaouenn Hor Yezh n°275 - Gwengolo 2013.
Eurvad, levenez
Yec'hed ha furnezh
Youl dir
Ha buhez hir
Anjela Duval
SKUB-DELIOÙ
Krog int da ’n em ziwiskañ,
Ar gwez-derv.
Emaint o vont da gousket.
Stumm skuizh o devoa
Ur pennad zo,
Ha morlivet o dremmoù.
Bremañ ’wiskont o mantell noz,
An iliav glas paket en-dro d’o c’horf.
.....................
Taolet ’deus o dilhad a-stlabez
En-dro dezho.
Ne reont ken a fed outo,
Rak lakaet ’deus ober reoù nevez
A-benn ma tihunint adarre
En Nevez-Amzer.
.....................
An derv-gwenn avat, ’m eus aon,
Zo gwall divi !
Manet int kousket dilhad ha tout !
Anjela Duval, Meurzh 1962
© Kuzul ar Brezhoneg
Katalog Nedeleg 2013, Keleier an embann n°17, zo deuet er-maez: kavet vo ennañ nevezentioù ar bloaz hag un dibab levrioù marc'had-mat.
Prizioù da dalvezout betek an 31 a viz Genver 2014. Paeamant gant chekennoù hepken. Evit an estrenvro deuit e darempred ganeomp.
Dont a raio Youenn Kervalan da sinañ e levr diwezhañ, Ar waremm vras, d'ar Sul 24 etre 2e ha 5e goude merenn da-geñver 10vet Gouel al levrioù e Gwenrann.
D’ar Yaou 14 a viz Du, etre 10e30 ha 12e30
Le jeudi 14 novembre, de 10h30 à 12h30
****
Levrdi Gwalarn-Librairie Gwalarn
15, straed an Dogerien/rue des Chapeliers
22300 Lannuon/Lannion
Herve Gouedard a zeuio da sinañ e romant nevez, Paul Sérusier, ul livour e Breizh, embannet gant Al Liamm.
Hervé Gouedard présentera son nouveau roman, Paul Sérusier, ul livour e Breizh, édité par Al Liamm.
http://www.brezhoneg.org/br/livres/paul-s%C3%A9rusier-ul-livour-e-breizh
Divi Kervella a ginnigo troidigezh Nikolazig (Le Petit Nicolas de Sempé et Goscinny) embannet
gant IMAV éditions.
Divi Kervella présentera sa traduction en breton du Petit Nicolas, Nikolazig, aux éditions IMAV.
