Miz Gwengolo 1904.
Dibenn an endervezh e oa. Gwiskañ a reas ar vaouez yaouank he boned du, he dilhad glav da vont er-maez, ul las en he godell, ur vazh en he dorn. Aet e oa an avel diroll goude lein war an enezenn. Daoublegañ he c’horf a ranke ober Mari-Anna da stourm ouzh an nerzh hud.
O vont etrezek ti he c’henitervez Félicienne e oa...
— Petra zo ’barzh da benn hiziv ? he doa lâret he mamm da Félicienne. Seurt vat ebet ’m eus aon ! Ha peseurt soñj a zo gant da genitervez dont betek du-mañ fenoz ?
— Lakaet eo bet an traoù e-giz-se ganeomp un nebeud devezhioù zo, sed aze tout, he doa respontet Félicienne d’he mamm.