Coronavirus
M'emaoc'h sparlet er gêr o troiata hep gouzout penaos tremen hoc'h amzer, na chomit ket da dortal:
Lennit levrioù brezhoneg,
Skrivit pennadoù, barzhonegoù pe romantoù,
Gwellait ho prezhoneg!
Empty
M'emaoc'h sparlet er gêr o troiata hep gouzout penaos tremen hoc'h amzer, na chomit ket da dortal:
Lennit levrioù brezhoneg,
Skrivit pennadoù, barzhonegoù pe romantoù,
Gwellait ho prezhoneg!
Ar stlejer-rouedoù
E oad? E anv? Morse emichañs, ar c'hoshañ bev n'en doa klevet kaoz eus mare ganedigezh Jos Trichien. Hag abaoe ma 'm eus-me soñj eo bet atav heñvel; oad ebet ne veze graet dezhañ. Ur c'haezh den treut e-giz un askell-groc'hen. Ha kreñv, ken kreñv! Gwisket hañv-goañv gant dilhad lien dislivet ha gleb peurliesañ. Ur mell boned-sigovi ront war e glopenn moal. Ar gasketenn-se, intret gant druzoni ar c'hroc'hen noazh, ho pije graet ganti ur mell kaoteriad soubenn druz! Sur a-walc'h ar boned a oa ken kozh ha Jos e-unan.
Va amzer bugel, goude ar skol, am eus tremenet eus aod Porzh Laouen betek ar c'hal ront. Hor buhez-ni, bugale ar vartoloded, oa sichennet war vaneadeg ar bagoù. E ti lod eus an dud ne veze debret ar pred bras nemet gant distro an tadoù. Ar vugale a veve a vandennadoù hag a heulie Jos Trichien eus ur penn d'ar penn all d'ar porzh. Rak aze oa e ved da Jos.
Piv oa Jos Trichien? Ur “paour-kaezh-siwazh”, ganet gwan a spered, dic'hallus dezhañ gounit e vara war ur vag evel e genseurted. Er mare ma vevomp bremañ, diouzhtu evel-just, e vije bet kavet plas dezhañ. Bac'het, dastumet e ti ar re sod prim-ha-prim.
Frañseza Kervendal
Marcelle Stephan (Douarnenez 1915 - Ploare 2001)
(Tennet eus al levr danevelloù “Un aod... ur galon”, Hor Yezh 1987)
Ar pesketaer
Ur wech e oa, ur wech ne oa ket hag ur wech e oa bepred hag e oa ur pesketaer paour e anv Maodez al Luron o chom e Ploumanac'h. Paour e oa evel Job; koulskoude 'nevoa nemet e wreg hag eñ da vevañ gant ar frouezh eus e labour. Ur gazeg treut-treut en devoa hag ur gozh gwetur bet en aluzen digant unan eus pinvidien Perroz, na lârin ket e anv. P'an nije tapet un toullad pesked ac'h ae da Lannuon da werzhañ anezhe da gêriz. An holl a anaveze Maodez evit bezañ un den a feson hag un den onest ar seurt na valee ket nemeur war hent Perroz.
Un devezh deus ar beure e savas abretoc'h evit an devezhioù all evit mont da besketa. Mont a reas ha pa oa erru en ribl ar mor, e kavas ur pesk bihan korf-ruz, unan eus ar bravañ. Tapout a reas anezhañ hep poan, hep e higen nag e rouejoù ha kerkent, ar pesk bihan a gomzas outañ hag a lâras dezhañ:
“Taol ac'hanon er mor,” emezañ.
“Na rin ket,” eme Vaodez.
“Taol ac'hanon er-maez, lâran dit, rak re vihan ac'h on c'hoazh da vezañ pesketaet; kalz brasoc'h evidon a gavi aze er mor.”
Maodez a sentas outañ hag e daolas er mor.
(Kontadenn war he hed e Kroaz ar Vretoned 10 a viz Eost 1902. Embannet ivez en Al lanv niv. 113 Gouhere 2007)
Marie-Louise Charran (Kervaria-Sular 1883, Lannuon 1934)
Melkoni
Gwenilied skañv, dudi ma daoulagad,
Perak n'ho kwelan ken o fraoñval 'us d'ar prad?
Kemeret peus an tec'h ha nijet pell deus Breizh,
Ha pa oc'h aet e-kuit, me a zo trist e-leizh.
Delioù ledan ha glas a ra kaerder ma bro,
Perak e tougit-hu liv sklaset ar maro?
Moarvat c'hwi wel o tont kañvoù kuzh 'vit tud Breizh,
Dirak ho tremm liv koar me a zo trist e-leizh.
Kloc'h bihan ma farrouz a gane ken seder,
Perak ne glevan ken bemdez ho kalv tener?
Tec'het eo an hini lakae buhez 'n ho kreiz,
Ha pa ne ganit ken, me a zo trist e-leizh.
Digabestr
Mari-Jozefin Milon (Koadoud 1880 - Koadoud 1964)
Evit ar 8et gwech e vez aozet gant kêr Garaez ha Festival al levrioù e Breizh ur genstrivadeg danevelloù. Ur priz 1 500 € zo evit ar gounezer.
Amañ-kevret e kavot reolenn ar genstrivadeg. Mar fell deoc’h kemer perzh, trugarez da gas ar skridoù dimp dre bostel a-raok ar 25 a viz Gwengolo : festivaldulivre@gmail.com
PEDADENN D'AR PIKNIK FEST D'AR SADORN 14 A VIZ GWENGOLO DA GREISTEIZ WAR AOD TRAEZH-BELEG E TERRUG
Ledenez KRAOZON - PENN-AR-BED
Evit derc'hel bev hon anvioù-lec'h brezhonek, hor glad,
liested ar yezhoù hag ar sevenadurioù...
Deuit niverus gant ho poued, ho serviedennoù,
ho pinviji sonerezh evit ar fest-deiz...
PLIJADUR 'VO !
Savet gant ur strollad kevredigezhioù ha gant Kevre Breizh